Ua faataga e leoleo ona tuua ogasami o Samoa e se vaaafi mai Amerika Samoa, ina ua mae’a ona faatumu pepa ma faamalieina aiaiga o tulafono faavaomalo i le tuanai o se gaioiga na malaga mai ai lea vaaafi mai le teritori, uia ogasami faatulafonoina o Samoa Tutoatasi ma malaga faasasa’o i Salelologa i Savaii e momoli se uta lea e faapea, e mo se faalavelave o se maliu.

Ua faailoa e le sui komesina o leoleo le susuga Papalii Monalisa Tia’i Keti, i le nusipepa o le Samoa Observer, o le Aso Tofi na tea nei na taofia ai e leoleo le vaa ona sa le faamalieina aiaiga o tulafono i le faia o pepa o aiaiga masani, peitai na toe faataga le vaa e alu ina ua mae’a uma ia vaega.

Faaali i se lipoti na faatoa faataga le vaa e tuua Samoa ina ua mae’a ona tuu lana uta ma e le o faailoaina i lipoti poo ai le faipisinisi i Amerika Samoa e ana le vaaafi.