E lē taumate e faate’ia le toatele i le faamatalaga ua alia’e i le faasee ese o le faia’oga lagolago o le ‘au a le atunuu le All Blacks, le alii o Leon MacDonald.
Lipotia e le One News ua faia lea faai’uga i le mae’a o se eseesega o manatu ma le alii faia’oga o Scott Robertson.
O le pepa o faamatalaga mai le NZ Rugby sa faamatuu ane i le aoauli nei ua ta’ua ai ua faia le faai’uga a MacDonald e faasee ese ma lona tofiga i le mae’a o feutana’iga ma Robertson.
Ua faailoa foi o faia’oga lagolago mo le puipuiga ma tulaga tau fesoota’iga, Scott Hansen ma Tamati Ellison o le a o la tauaveina tiute o MacDonald mo taaloga o totoe o le season.
Ta’ua foi i le lipoti se faamatalaga mai le faia’oga o le ‘au e faapea sa faia lava ni a la faatalanoaga ma MacDonald ma ua malilie e lē o sologa lelei mea uma peitai e tau fai naunau uma i le lelei o le ‘au ma e talitonu o le faai’uga ua faia o le faai’uga aupito sili lea mo le ‘au.
Ua sauni le All Blacks i le taimi nei mo lana malaga taamilo i Aferika i Saute.
Puna o Faamatalaga: https://www.1news.co.nz/2024/08/22/all-blacks-bombshell-as-assistant-coach-leon-macdonald-steps-down/
