Ua faalēaogāina nisi o faigamalaga a le Interislander mo le po ananei faasolo atu i le taeao o le Aso Tofi.
O le ‘afa o le valu o le po ananei lea e amata faitau atu ai faigamalaga faalēaogāina seia oo atu i le toe kuata o le iva i le taeao o le Aso Tofi, ma ua mafua lea ona o uiga loulouā o le tau.
E lē o faigofie feoa’iga ma fela’ua’iga i le va o motu e lua auā o lea ua totoe ai nei na o le tasi le vaa o loo fealua’i, o le Kaitaki auā o le Aratere lea lava o loo tu.
E tuufaatasia tala o le taeao e lē o iai se suiga i vaa feoa’i a le Bluebridge ma le tala o loo mata’itū pea ma e logo mai lava pasese e aafia.
I luga o le upega tafailagi a le Interislander o loo ta’ua ai e faamuamua le saogalemu o pasese faapea ai lana aufaigaluega.
Puna o Faamatalaga: Interislander ferries cancelled from Tuesday night due to rough weather | Newshub
