O le a lē toe tuuina atu i konekarate tuma’oti le galuega o le teuina o fanua ma le fufuluina ia mamā o falema’i faaitumalo uma i le atunuu, ae o le a ave i fono faavae a itumalo faapalota e faasoasoa ai lea galuega e faatino e komiti a tina, o autalavou poo taulelea foi o nuu ma afio’aga.

Faaalia e le Minisita o le soifua mālōlōina i le sainia o maliega e faamatuu ai i Fono Faavae o itumalo i Savaii lea galuega, e sefulu miliona tupe a le matagaluega e faaalu i konekarate sa faia lea tautua, peitai o le a selesele nei iai nuu ma afioaga o itumalo faapalota.

Faaalia foi e le minisita o le soifua mālōlōina le afioga Valasi Luapitofanua Toogamaga Tafito Selesele, ua tofu taavale fou uma foi falema’i faaitumalo i Savaii ma ua tusi ai lava le igoa o le falema’i faaitumalo i le taavale.

Ua faapena foi le fuafuaga a le matagaluega mo falema’i faaitumalo i le motu o Upolu.