Ua faailoa e le ta’ita’i o le pati faaupufai e puipuia aiātatau a tagata i le fono a le faafaletui o faipule a lea vaega faaupufai ma ona sui lagolago sa usuia i le nofoaga tutotonu o le pati i le Aso Tofi o le vaiaso nei, e lē tatau ona toe tupu le faaletonu na mafua ai ona malolo i le palota tele a le atunuu i le tausaga e 2021.

I le saunoaga a le ta’ita’i le susuga Tuilaepa L Sailele Malielegaoi, na ia faailoa ai o le to’atele o a latou sui tauva i itumalo o le mafua’aga tonu lea na lē manuia ai i le faai’uga o lea palota tele.

O lana tuualalo i sui lagolago o itumalo e lē tatau ona toe tupu lea tulaga i le palota tele o le 2026.

Na oo foi le saunoaga a le susuga Tuilaepa i tulaga ua oia ai le lotoifale o le vaega faaupufai o le Faatuatua i le Atua Samoa ua Tasi ma ia faailoa ai, ua 46 tausaga o le HRPP ma ua matua i faiga faapatī faaupufai, ae o patī fou e le’i iai ni taeao o loo tau faata’ita’i.

Le ta’ita’i o le vaega faaupufai e puipuia aiātatau a tagata i le fono muamua o le tausaga fou a lea pati ma le faafaletui o sui faipule, le susuga Tuilaepa L Sailele Malielegaoi.