A o tapena ai le isi fuafuaga o le tala o le tupe a le malo mo le isi tausaga faaletupe o sosoo ai nei, o se fesoasoani malosi le sao o le malo o Ausetalia e $28 miliona tala Samoa mo fuafuaga tau tupe a le malo i le atina’e o le tamaoaiga mo le tausaga faaletupe o loo faagasolo i le taimi nei.
Ua faaopoopo ai i le 187 tesimale 7 miliona tala le fesoasoani a lea malo mo Samoa i lana faasoa ua faatulaga e faatino i totonu o le valu tausaga lea na amata mai i le tausaga e 2023 ae mae’a i le tausaga e 2031.
I le sainia ai o lea fesoasoani tupe faaopoopo i le va o le sui o lea malo i Samoa ma le Minisita o Tupe na faailoa ai e le Komesina Maualuga o Ausetalia o William Robinson, o le pine lea o le talitonuina o faiga faapaaga i le va o lona malo ma le malo o Samoa.
O lea fesoasoani na faaalia e le Komesina Maualuga o le a faatupe ai nisi o fuafuaga a lo tatou malo e pei o totogi o faia’oga, faatauina mai o vailaau ma fuālaau faafoma’i ma isi vaega o galuega tau soifua mālōlōina aemaise o le faaalu i galuega o auala tetele ina ia mautinoa le lelei atoatoa o feoa’iga i soo se vaega o le tatou atunuu.
O le faafetai mai le Minisita o Tupe le afioga Lautimuia Afoa Uelese Vaai e avea ai ma sui o le tatou malo na momoli i le sui o le malo o Ausetalia, ma faailoa iai o le a ave le faamuamua i lana fesoasoani i le tali atu i vaega sili ona mana’omia e tagata lautele.
Faaalia foi e le Minisita o Tupe o nisi o vaega sili ona tāua e ave iai le faamuamua o le soifua mālōlōina, a’oa’oga, ma auaunaga mo tagata e iai o latou mana’oga tumau.
