O loo taumafai nei se kulupu o tagata e aumau i le pitonuu o Wakerley ina ia taofia se ekalesia mai le fausia o ni units o fale e 44 i luga o ona laufanua.
O se tasi o lea kulupu o se tamā e suafa ia Peter Bingham o loo tu malosi e taofia le lotu lea mai le fausia o poloka o units ia i le fanua o loo avanoa.
Fai mai le latou mau o le faia o ia fale o le a faateteleina ai le faafitauli o le traffic i nofoaga lalata ane o Brisbane, fai mai foi le isi popolega o le kulupu lea e lē taumate o le a lē lelei le vaaiga o ia fale atoa ma le manatu na pau le mafuaaga o le faia o ia fale e le lotu ina ia maua ai se polofiti ma ua leva tausaga o taumafai e faatino lea tulaga.
I lalo o le maliega o le a fausia ai ia fale, le Wakerley Proposal, a itiiti mai pe 85 pasene o fale o le a fausia o le a faafaigofie ona gafatia ma o le a faatonutonu lelei foi le tau mautotogi.
O le fanua e umia e le Roman Catholic Archdiocese of Brisbane ma o loo iai i luga le Ekalesia Katoliko St Judes.
E lē o ta’ua i le lipoti se faamatalaga mai le ekalesia lea ae ua ta’ua o loo tālia se tali mai ia i latou e tusa o lenei mataupu.
Puna o Faamatalaga: https://www.google.com/amp/s/amp.abc.net.au/article/104894050
