O le a lē faaseetuāgalu mai le tofi Minisita le sui Faipule o Gagaifomauga Numera 3 le Susuga Laauli Leuatea Polataivao Fosi Schmidt, ina ua mae’a ona faia e leoeo ona moliaga e sefulu i le taeao o le Aso Faraile na te’a nei.

O ia moliaga e fesoota’i i le su’esu’ega o le maliu o Tuuau Maletino lea sa faatino e se tamalii sa avea ma ta’ita’i leoleo ae ua faamālōlō lona toe avea ma malu o le malo, ona o lea su’esu’ega sa ia faia e aunoa ma se faatanaga a le Komesina o leoleo.

O lea tamalii le susuga Li’o Faataumalama Auava o loo molia foi faatasi ma isi e to’afā e aofia ai le faipule o Salega Tasi, lea ua faatulaga o le masina o Me o le tausaga nei e valaau ai molimau.

O isi moliaga o Laauli e fesoota’i i se tagi a ni leoleo sinia se to’alua ma se tamalii e faamautū i Ausetalia e pei ona latou tuua’ia le Minisita i le faia o ni tuua’iga sese ma taufaaleaga i auala o fesoota’iga.

O le aso 4 o le masina fou o Fepuari e valaau ai moliaga o le Minisita i le Faamasinoga Faaitumalo, ae o lona finagalo lenei ina ua fesiligia e tusa o lona tofi Minisita o le Kvapeneta.

O le mataupu tau faamasinoga sa molia ai Laauli i le tausaga e 2017 sa mafua i se finauga i le va o le au faisea o se kamupani nonu sa aofia ai ma le Faipule o Gagaifomauga 3 faapea le Faipule o Faasaleleaga Numera 5.

O Iuni o le tausaga e 2020 na lau ai le faai’uga o lea mataupu ma e leai se moliaga o Laauli na faamaonia ma faapena ona soloia uma ai moliaga e silia i le selau na totoe mai le aofa’iga e 200 ma ona tupu.

Na loka vaega uma o le lotoā o le ofisa autū o leoleo i Apia mai le taeao o le Aso Faraile na te’a nei na faia ai moliaga o le Faipule o Gagaifomauga 3.

Na faato’ā tatala ina ua tuua e Laauli le ofisa autū i le mae’a o galuega a leoleo i moliaga o le Minisita o Faatoaga ma Faigafaiva.

E leai ni aiaiga o tatala ai le sui Faipule e faatali ai le valaauga muamua o ona moliaga i le faamasinoga.