O loo faasolo manuia se tamā ma sona atalii e fitu tausaga mai manu’aga tuga mai se faalavelave i se tasi o alalafaga i Savaii i nai aso ua tuanai atu, o lea faalavelave na semanu e ma’umau ai o la soifua.

E oo mai i le taeao nei e lei tali mai lava le Sui Komesina o Leoleo ia Papalii Monalisa Tiai Keti i le fesili na tuuina atu iai e a tatou tala e faatatau i lenei mataupu, peitai o se tasi o sui o le ofisa o le Toomaga mo ē Puapuagatia o loo vaavaaia lelei i laua na manunu’a na ia faamaonia mai lea tulaga.

E tusa ma le faamatalaga a le sui o le Toomaga o le tamā ua aafia o loo iai se feeseeseaiga ma lona fale faigaluega sa galue ai ma o loo tagi lea fale faigaluega faasaga i lea tamā i ni seleni e faitau miliona lona aofai.

O loo masalomia o le tulaga lea ua mafua ai le faia e le tamā o manu’aga ia te ia lava faapea lona atalii a o lei taumafai ai loa e susunu lo latou fale a o iai i totonu ma lona atalii.

O le vave o gaioiga a le Tineimu i Salafai na faasaoina mai ai peitai o manu’aga e matuia tele.

Ua faamaonia mai o loo ua faasolo manuia i laua uma i le Falemai.