O se tala faanoanoa le maliu faafuase’i ai i le faaiuga o le vaiaso talu ai, o se tasi o alo o Samoa, Kelly Meafua o loo taalo lakapi i le kalapu lakapi a le Montauban i Falani, ina ua puna ifo i lalo i le river Tarn mai le auala laupapa, le Pont-Vieux i le tusa ma le 20 mita le maualuga. O Meafua sa taalo muamua foi i le auta’itoafitu a le Manu Samoa a o lei malaga ese atu e taalo i lea kalapu i Falani na saini ai lana konekarate i le 2015.
O le mae’a ai o le latou taaloga ma le ‘au a le Narbonne lea na manumalo ai le ‘au sa taalo ai Meafua, i ‘ai e 48 i le 40, ona aga’i ai lea mo se latou fiafia e sami ai le manumalo ma patipatia ai foi le taaloga faai’u a le latou ‘au i totonu o le latou malae mo lenei taamilosaga.
Atonu ua ova le fiafia o le alii 31 tausaga mai lea faai’uga mata’ina o le taaloga a lana ‘au, ua oo ai ina puna ifo, ma ma’umau ai lona soifua.
Na taumafai se isi o alii o le latou ‘au, Christopher Vaotoa e oso ifo i le vaitafe e saili le tino o Meafua, peitai e lei manuia. Na faato’ā maua le tino o Meafua i e taeao o le aso na sosoo ai.
