I taaloga ua maua le avanoa o Michael Hooper i le ‘au taitoafitu a Ausetalia ma o le a taalo i le isi vae e sosoo ai o le taamilosaga taitoafitu lea e faia i Hong Kong.
Faamaonia mai ia faamatalaga i le asō e le alii o Hooper sa kapeteni i le Wallabies a Ausetalia.
E faafā ona manumalo Hooper i le John Eales Medal ma ua faatulaga o le a taalo i le Sevens lea i Hong Kong e muamua fetaui ai ma le ‘au malosi a Fiti.
O le tausaga na tea nei ia Novema na uluai ulufale ai Hooper i le ‘au taitoafitu a Ausetalia ae sa iai se faaletonu i lona vae na lē mafai ai ona taalo i le tausaga talu ai a o lea la ua faamaonia mai o le a taalo i taaloga o le masina fou i Hong Kong.
Saunoa le faiaoga John Menanti o le aofia mai o Hooper o le isi lea suiga e lua ai suiga o lana ‘au i le fitu i Hong Kong.
