E tolu vaega ua vaevaeina iai fale o aiga na faaleagaina e lologa faapea le afā o Gabrielle.

O le faiga fou lenei ua faaigoaina o le category system o le a iloa ai e aiga aafia le tonu ma le lumanai o le latou fale ua faaleagaina nei, ma na ta’ua e le minisita o galuega toe faaleleia o le afā Grant Robertson o le taunuuga lea o galuega fai faatasi a kamupani inisiua faapea councils a o taumafai ai e iloilo nofoaga ua matuai maualuga le lamatia pe a toe fau ai se fale.

O vaega e tolu e taua o le Low Risk – poo nofoaga nei o loo tu ai fale na faaleagaina e lologa e mafai ona toe faafou pe toe fau ai lava le fale i le nofoaga e tasi.

O le vaega lona lua o le Managed Risk – o nofoaga nei e moomia le toe fai o ogapaipa ma alavai ina ia mafai ai ona gafatia isi aafiaga o le tau i le agai i luma.

Ma le vaega lona tolu o le High Risk – poo nofoaga nei e le o toe saogalemu i se nofo ma e le tatau ona toe fau ai ni fale.

Fai mai le malo o fale o loo i lalo o le vaega muamua lea o loo ave iai le faamuamua ina ia vave ona toe faaleleia ma toe agai iai aiga.

O le vaega lua ma le tolu e fai lava si umi ma e iai talanoaga e moomia ona faia ma le komiuniti.