Ua faalauiloa e le afioga Savae Sir Michael Jones le faatuina o le Pasifika Rugby Hall of Fame ma le faamoemoe e saunia ai se avanoa e faamalosia ai atili komiuniti a le Pasefika.
Ua faailoa i se pepa o faamatalaga a le South Seas Healthcare se vaega tāua ua ausia i lenei vaiaso faatasi ma le faalauiloaina o lea fuafuaga ma o loo taulamua ai le Tausoa Faatasi, o le kulupu faufautua tau Pasefika a le NZ Rugby lea foi e aofia ai ma le afioga Saveatama Eroni Clarke.
O loo momoli ai le faamalo a le auaunaga lea a le South Seas i nai tamafanau a le Pasefika o loo taulamua i nei faamoemoega ma o le fono faatonu a le Pasifika Rugby Hall of Fame o loo aofia ai ma se tasi o tamaitai iloga, o se alo foi o Samoa sa taalo i le Black Ferns, Seiuli Fiaoo Faamausili, atoa ai ma se tasi o sui sa iai o le All Blacks, Peter Alatini, tama taalo sa iai o le Manu Samoa, Lemalu Silao Vaisola Sefo ma Cynthia Taala Timaloa, sa kapeteni i le ‘au a le Manu Sina atoa ai ma Savae Michael Jones.
O loo ta’ua foi i le pepa o faamatalaga le faia ai foi o se tribute poo se faamanatu mo se tasi iloga i le lakapi ua faiilagi le folauga, le alii o Jonah Lomu, e ala i le Jonah Lomu Memorial Award.
