Ua sainia e le Peresetene o Amerika, Donald Trump se poloa’iga e aveesea mai ai le malo tele mai le faalapotopotoga o le Soifua Mālōlōina a le Lalolagi, le World Health Organisation (WHO).

Fesiligia e le to’atele pe aisea ua faatino ai e le alii Peresetene lea faai’uga ae poo ā foi ni ona aafiaga.

O le WHO e fesoasoani i le puipuia o le soifua mālōlōina ma le saogalemu o tagata o le lalolagi ma e maua mai le ⅕ o lana tupe faaaogā mai le malo tele o Amerika peitai ua lipotia e le CNN o le finagalo o Trump ua ia tuua’ia ai le WHO i le lē sa’o ma le faaaogāina o tupe a Amerika.

I se pepa la o faamatalaga mai le WHO ua ta’ua ai lo latou lagona i le faai’uga a le malo tele ma le tulaga ua oo iai le faai’uga a le Peresetene fou.

E to’atele nisi e lē o fiafia i le faai’uga ua faia a Trump ma ua talitalia ni aafiaga o lea faai’uga i le faagaioia o lea faalapotopotoga tele i le lalolagi ma itu sa fesoasoani ai i tagata i taimi o ni mafatiaga ma aafiaga tau le soifua mālōlōina.

Puna o Faamatalaga: https://edition.cnn.com/2025/01/21/world/world-health-organization-trump-withdraw-explainer-intl/index.html