Ua iva tausaga talu ona tala i lalo le ofisa sa faatino ai galuega auā le tautuaina o le Fono Aoao Faitulafono a le atunuu, ae o lea ua faato’ā aloaia le suaina o le eleele e amata ai le galuega o le ofisa fou, o le a faatupe uma e le Malo o Ausetalia.
I le sauniga o le suaina o le eleele na saunoa ai le Komesina maualuga o lea Malo i Samoa ma ia faailoa o se galuega o le a le nofo aitalafu ai le Malo o Samoa pe saili se nonogatupe e fausia ai, auā o le a sasaa mai le tamaoaiga o lona Malo e fausia ai le galuega, lea ua fuafua e tusa lona tau ma le 30 miliona tala Ausetalia.
O le tausaga e 2012 na amata fuafua ai le fausia o se maota fou mo galuega a le ofisa o le fono aoao faitulafono, ma tala ai loa i lalo le ofisa tuai i le tausaga e 2015.
Se vaega o le saunoaga a le ta’ita’i o le Malo le afioga i le tamaitai Palemia, afioga Fiame Dr Naomi Mataafa i le sauniga o le suaina o le eleele e aloaia ai le amataina o le fausia o le nofoaga fou mo le Ofisa o le Fono Aoao Faitulafono i Mulinuu.
O se galuega ua fuafua e 22 masina o le a fausia ai, lea ua faatulaga e tatau ona mae’a ia Aperila o le tausaga e 2026 a o lei faia le isi palota tele a le atunuu.
Mo le silafia e le atunuu o le tasi o galuega na faatupe e le Malo o Ausetalia faatasi ai ma le sao tau tupe o le Malo o Samoa o le fausiaina o le maota fono fou ua iai nei o le Palemene lea na tatala aloaia i le masina o Mati o le tausaga e 2019.
