Fai mai o loo faaauau pea ona una’ia le alii taalo o Hoskins Sotutu ina ia faia se suiga i ana fetuuna’iga faavaomalo i le taaloga ina ua toe misi foi i le isi ‘au a le All Blacks ua faalauiloa talu ai nei.
Fai mai le Newstalk e ui sa tulaga ese le taalo a Sotutu i le Super Rugby Pacific o le tausaga nei mo le Blues, peitai e lē o aofia mai i le ‘au a le faia’oga o le All Blacks ua faalauiloa.
O le alii talavou o Wallace Sititi lea ua mata’itū pea e le alii faia’oga o Robertson e pei ona faailoa i le lipoti.
Fai mai ona o nisi o suiga i tulafono a le World Rugby e agavaa ai tama taaalo, ua una’ia ai Sotutu e se tasi foi tama taalo o le All Blacks, Akira Ioane ua tatau ona silasila i se isi tulaga.
O le a agavaa Sotutu e taalo mo Egelani ona o lona tina ma e lei toe taalo mo le All Blacks talu mai le 2022, o lona uiga o le a agavaa ai e taalo mo Egelani i le tausaga fou pe afai e maua sana kalapu i Egelani.
Afai la ae manatu Sotutu e taalo mo Egelani, e mana’omia ona sa’ilia se faatagana mai le NZ Rugby ona faato’ā mae’a lana konekarate i Niu Sila i le faai’uga o le 2026.
E lē na o Egelani e ono taalo ai Sotutu, o loo iai foi Fiti le atunuu o lona tuaa o Waisake lea foi sa fai ma sui o le ‘au a Fiti i tausaga a o taalo ai mo le atunuu aemaise le Blues i Aukilani.
Puna o Faamatalaga: https://www.nzherald.co.nz/sport/rugby/all-blacks/all-blacks-akira-ioane-urges-hoskins-sotutu-to-switch-to-england-after-latest-selection-snub/AMNOQTSLJRF7JCOP7NWUDDZZ4A/
