Ua faamautū mai e le komiti a le malo o loo galulue i tapenaga o le totogiina atu o le taui tupe e 10 miliona i tagata o aiga o le itumalo o Safata faapea ma pisinisi tau tulisi i le itumalo, talu mai masina ua tuana’i e oo mai i le masina nei o Iuni, e leai se taui ua totogiina atu.
Ua māfua lea tulaga ona e iai nisi o tapenaga sa toe faatino e le komiti ona o mana’omiaga mai le Matāgaluega o Tupe a le malo o loo gafa ma le faamatuuina atu o seleni o taui e ta’i afe selau tālā mo le tagata e to’atasi.
O ia tapenaga faifaipea na toe suia ai le numela o le aofa’i o tagata e agavaa i le taui mai le 8,989 i le 10,457.
O maliega e ala i pepa o M.O.U. poo le Memorandum Of Understanding o lona aofa’iga e 1,225 e mai lea aofa’iga e 957 maliega ua mae’a ona sainia ma ua aofia ai le silia i le 6 afe tagata ma o maliega ia ua tuuina atu i le Matāgaluega o Tupe mo le latou galuega e taualuga i le tuuina atu loa o seleni o taui i teugatupe.
Le ta’ita’ifono o le komiti a le malo e feagai ma galuega fesoasoani i ni aafiaga o le gataifale, afioga Fui Tupa’i Mau Simanu.
A fua i le aofa’iga e 10,457 tagata o Safata e maua le taui e afe selau tālā o le aofa’iga o le seleni e faaalu ai e 11 miliona, 502 afe ma le 700 tālā.
E lē o faitauina ai pisinisi tau tagata tafafao e 4 o loo i le itumalo e agavaa foi i le taui lea e faatino atu e le pulega o tagata tafafao mai fafo.
O le pulega lea e ave iai tupe mai le taui 10 miliona e aga’i iai i latou e ana ia pisinisi e ave iai faamaumauga o vaega o a latou pisinisi tulisi ua aafia ona o le goto o le manuao o le Manawanui i gataifale o Safata.
I le taui mo se vaega o le afio’aga o Siumu ua faailoa e le ta’ita’ifono o le komiti a le malo e lē itiiti ifo ma le 4 miliona le tupe o le a faatino ai, ae o le a iai se taimi e fono ai le komiti mo le talanoaina o lea fuafuaga.
