A o lava ai pea suāuu ma penisinisi maua mo le faaaogāina i galuega ma auaunaga eseese i Samoa, o lea ua amata faatino se tasi o ta’iala mo le faatonutonuina o le faaaogā tatau o ia oloa i galuega a le malo.
O le Aso Toona’i na te’a nei na amata faamamalu ai le utu uma o taavale i le pamu a le malo o loo i Siusega, o se ta’iala o le a aofia ai ma taavale a faalapotopotoga tuma’oti uma a le malo lea o loo utu i pamu o loo faagaioia faapisinisi.
Peita’i ua faailoa e le ofisa sinia o le Matāgaluega o Tupe i le fono a le komiti faufautua o faalavelave faafuase’i matuiā a le malo ma tusitala, o le masina fou o Iulai e faato’ā utu ai taavale a faalapotopotoga tuma’oti i le pamu a le malo ona e iai vaega o loo tapena muamua.
O le tasi o aiaiga tāua o lea ta’iala mai le komiti galulue a le malo i le matāgaluega o tupe o loo vaaia taavale uma a le malo, o le a tapulaa le aofa’iga e lima taavale a le matāgaluega ma le faalapotopotoga e faaaogā.
I le pitolaau a le matāgaluega o leoleo falepuipui ma le toe fuata’ina, o le a faia siaki e ala i poloka masani e iloa ai taavale a le malo o loo usita’ia le tauave o le pepa faataga e faaaogā ai se taavale i le faai’uga o le vaiaso, faapea le mae’a o itula faigaluega mai le Aso Gafua i le Aso Faraile.
O le aso 4 o le masina fou o Iulai e taunuu ai le isi vaa e aumaia oloa tau suāuu ma penisini mo Samoa.
