O le 1 tesimale 5 piliona o tupe ua faatatauina e faaalu e le malo mo le isi 12 masina e pei ona taoto i le tala faatatau o le tupe o le a amata soalaupule e le Palemene i lenei vaiaso, ua aofia ai ma le 41 tesimale 5 miliona o se nonogatupe e fesoasoani i le faatupeina o lea fuafuaga.
O le fā tausaga ua mavae o le ulua’i faigāmalo a le Faatuatua i le Atua Samoa ua tasi e le’i toe faia ai se nonogatupe e fesoasoani i ana tala o le tupe ae sa ave le faamuamua i le totogiina o aitalafu i fafo.
Peita’i o lea ua faailoa e le Minisita o Tupe i le tala faatatau o le tupe fou, ua lelei le tulaga o Samoa i le totogiina o ia aitalafu lea e oo mai i le taimi nei o loo paleni le 699 tesimale 5 miliona tālā le tuuaofa’iga o ia aitalafu, talu mai le faai’uga o le masina o Mati o le tausaga nei.
Ae i le 41 miliona lima selau afe tālā ua faaalia e le Minisita o Tupe le afioga Mulipola Anarosa Ale Molioo i lana saunoaga faaminisita o le tupe o se nonogatupe e māmā le tului poo se soft term loan.
Faaalia ai foi e le Minisita o le mausalī o le faagaioina o tulaga tau tupe a le atunuu i tausaga ua tuana’i ua faaitiitia ai le tulaga lamatia o le gafatia e Samoa ona totogi ana nonōgatupe mai le tulaga lamatia maualuga poo le high risk, i le tulaga lamatia feololo ua iai nei poo le moderate risk.
Ua faailoa foi e le Minisita o Tupe ua suia le faamatuuina mai o meaalofa tau tupe poo grants a le Faletupe o le Lalolagi ma le Faletupe o Atina’e o Asia, i le aumai na o le 50 pasene o ia meaalofa tupe ae o le isi 50 pasene e mafai ai e le malo o Samoa ona faia ni aitalafu poo nonogatupe.
O le Aso Lua o le vaiaso nei o le a usuia ai le fonotaga a le Palemene e amata soalaupule ai le tala faatatau autū fou o le tupe a o lumana’i ai vaiaso o totoe o le masina lenei o Iuni e mae’a ai le tala faatatau o le tupe o le tausaga faaletupe 2025 i le 2026.
