O le 12 masina na amata ai le fua a le Faamasinoga Faaitumalo i se faasalaga faafalepuipui o le alii mai Saina o Qinpin Yan, ua toesea isi masina e ono ona o tulaga lelei faasino ia te ia, ae tuli na o le 6 masina i le toese i Tanumalala.

O le faasalaga lea na aumai i le faai’uga a le afioga i le Faamasino o le Faamasinoga Faaitumalo le afioga Leota Raymond Schuster i le Aso Gafua o lenei vaiaso.

Ua aiaia foi le toe avatu mo se isi faasalaga pe afai e mae’a tuli le ono masina, e lei mae’a ona totogi lana salatupe e 130 afe tala e mafua i le taumafai e aveese ma Samoa se pusaoloa tele o figota o fugafuga, sea ma maisu.

O le ono masina o le faasalaga i le falepuipui o le togisala lea i le moliaga o le taumafai i se auala faaalatua e togi tupe lē sa avea ma faauluuluga o le Matagaluega o Tiute ma Tupe Maua, i le taumafaiga a lē ua molia ia aua ne’i su’eina le pusaoloa sa fafao i figota e pei ona faailoa atu.

Ua iai le aiaiga o le faasalaga a mae’a uma ona totogi le 130 afe tala ma tuli le ono masina ona aveesea faamalosi pe tipoti ese loa ma Samoa lē ua molia ma ua tapu ai ona toe ulufale mai i le atunuu mo le umi e 5 tausaga.

O le moliaga o le gaioiga faaalatua na ave ai e Yan le 5 afe tala i lē sa faauluulu iai le Ofisa o le Tiute poo le bribery, ua faaalia e le faamasinoga i le faai’uga o se solitulafono matuia e pei ona faailoa talu ai nei se ioega a le Malo e amata faatino le faiga faavae e tetee atu ai i soo se faiga faaalatua ma gaioiga piopio le anti-corruption policy.