Ua faailoa i se pepa o faamatalaga lata mai, le faamautū ai nei o tapenaga mo le aveesea mai o pusaoloa e tolu o loo tafefea solo i ogasami tu lalata i le vaega o loo goto ai le vaa su’esu’e o le fitafita o le sami a Niu Sila le HMNZS Manawanui.
O le Aso Faraile le faai’uga o lenei vaiaso ua amata ai galuega mo le aveesea o ia pusaoloa ma taumafai e ave i uta i le pa’u mātū, e pei ona fuafua e tolu poo le sili foi aso e faia ai lea galuega e fua i tulaga o le tau.
O se kamupani mai Asia e pei ona faailoa i le pepa o faasalalauga o le a faia lea galuega ma le faamoemoe o se galuega o le a faatino ma le faaeteete ina ne’i afaina ai amu ola o le sami aemaise i le ā’au.
E lua pusaoloa o loo tuufua ae o le isi o loo loka e le’i matala ma ua na o taumafa o loo iai.
E faailoa mai lea galuega a o faagasolo ai i lenei vaiaso le feiloa’iga lona lua a tagata o nuu ma afio’aga o loo aafia o latou gataifale i ni suāuu masaa mai le vaa su’esu’e o loo goto i Saute o Samoa.
O ia feiloaiga e pei ona faailoa mai e se molimau, sa fesiligia ai e nisi o ia afio’aga sui o le malo o Niu Sila ma sui o le fitafita o le sami o lea malo, pe o le ā le vave e mafai ona aveesea ai suāuu o loo i luga o le vaa.
Ma le fesili tāua poo ā ni taui e mafai ona latou maua, ona ua aafia lo latou soifuaga masani o aso uma sa fagogota ai i le sami ma maua figota ma i’a mo taumafa ma le faatau e maua ai seleni, auā o lea ua taofi ona toe fagotaina o latou gataifale.
