Ua toe tolopo i le aso 12 o le masina fou o Iulai le talosaga a le Faatuatua i le Atua Samoa ua tasi i ni moliaga o le lē usitai ma le lē fa’aaloalo i le fa’amasinoga e pei ona tuuaia ai le palemia tausi lē tumau, o le loia sili a le Malo, o lē sa avea ma fofoga fetalai ma le failautusi o le fono aoao faitulafono.
O le valaauina o le mataupu i le Aso Gafua na laga ai e le loia o loo tulai mo le Palemia tausi lē tumau ma le Loia Sili a le malo le lē tatau lea ona auai o faamasino o le faamasinoga maualuga sa iloiloina le talosaga a le FAST. O lea talosaga na aumai ai se faatonuga i le Aso Sa 23 o Me e faatumau le malelega a le Ao o le Malo i le aso 20 o Me na valaau ai le tauaofiaga o le Palemene ina ia faia i le Aso Gafua 24 o le masina lava na te’a nei.
O lea ua faatonuina nei e le afioga i le faamasino Sili Satiu Simativa Perese e ao ona tuuina atu se talosaga aloaia i luma o le faamasinoga mo lea tulaga ua lāga mai. O lea talosaga o lea iloiloina ma fai ai se faaiuga pe tatau pe lē tatau ona auai ia faamasino e aofia ai le faamasino sili i le suesueina o le talosaga a le FAST fa’asino i moliaga a le Palemia tausi lē tumau ma isi o loo tu’uaia.
O le isi vaega na lāga o le tuu saunoa lea o lē sa fofoga fetalai e lē mafai ona molia faapea le failautusi a le ofisa o le fono i lalo o aiaiga o le tulafono a le fono aoao faitulafono poo le “legislative Ordinance.” O mataupu nei ua talosaga loia o itu auai e tatau ona suesue faatasi uma i le taimi e iloilo ai mau o loo fa’avae ai le talosaga mo le faia o ni moliaga o le lē usitaia ma le lē fa’aaloalo i le faamisnoga o i latou o loo tu’uaia.
O le ā faatoa iloa lea tulaga pe ā toe valaauina le mataupu i le isi lua vaiaso o muamua nei.
