Ua tolu nei aso talu mai le Aso Gafua na faasolomuli ai i tua e le Palemia galuega o le talanoaina o nisi o tulafono toe teuteu, ae alo muamua le Palemene e tagofia le lafo lona lua o le lē faatuatuaina o le Palemia ma le Kapeneta sa tuuina atu e le sui faipule o le itumalo faapalota o Gagaifomauga 3.
O le Aso Lua sa tolopo mai iai le talanoaina o le lafo e le’i saofia e ui sa mālōlō le fono mo le lua itula ae tapena atu vaega sa fia faamanino.
Peitai e toe usu ane le fono a le Palemene i le te’a o le 12 i le aoauli ua atili nenefu ma lē manino le Fofoga Fetalai ma faia ai le faai’uga e toe tapena uma atu le lafo ma ni teuteuga ona faato’ā tagofia ai lea e le fono usu a Samoa i le Aso Tofi.
Ae o le tuuina atu o le lafo lona lua o le lē faatuatuaina sa fesili ai le tamaitai Palemia i le Fofoga Fetalai e aumai muamua sona finagalo e faamalamalama ai le mafua’aga ua ia talia ai le isi lafo o le lē faatuatuaina ae ua mae’a ona faia iai le faai’uga a le Palemene i le isi foi lafo lava e tasi o le lē faatuatuaina, lea sa manumalo le teena i le aofa’iga e 34 faipule ae 15 faipule sa lagolagoina.
Sa ave ai foi ma le tuualalo a le Palemia i le nofoa e aumai muamua se fesili pe talia pe teena e le fono aoao le toe avatu o se isi lafo o le lē faatuatuaina.
Ua lē talia e le Fofoga Fetalai lea fesili ae ua ia faailoa o le Aso Tofi o le a aga’i sa’o i le talanoaina o le lafo lona lua o le lē faatuatuaina.
Sa manino le finagalo o le ta’ita’i o le Itu Agai i le Palemene ua latou lē lagolagoina le lafo a le sui faipule o Gagaifomauga 3 ona e lē o talia a latou teuteuga sa fia faaofi i le lafo.
O le teuteuga o le lafo o loo finauina e le Itu Agai ia faamavae le Palemia ae fautuaina le Ao o le Malo e faatā’ape le Palemene ina ia toe foi le atunuu i se faigāpalota tele.
O loo tumau le finagalo o le faipue o Gagaifomauga 3 ma se vaega to’atele o faipule o le Faatuatua i le Atua Samoa ua Tasi latou te lē lagolagoina le toe faia o se faigāpalota a o le’i mae’a le lima tausaga o le paea’iga lona 17 o iai nei a le Palemene.
O le autū o le lafo a le susuga Laauli Leuatea Polataivao Fosi Schmidt, ia faamavae le Palemia ma lana Kapeneta ae toe filifili se isi Palemia ma se Kapeneta fou e faaauauina le pulega o le malo.
O vala ia ua finagalo ai le Fofoga Fetalai e tolopo i le Aso Tofi e talanoaina ai le lafo.
Ua fautuaina itu uma o le maota o loo aafia ina ia faaoo uma atu a latou tapenaga i le Fofoga Fetalai ia lē silia le ta tonu o le 12 o le aoauli o le Aso Lulu o le vaiaso nei, a o lumana’i le Aso Tofi e toe tauaofia ai le Palemene.
