Ua siitia avanoa tau le tamaoaiga mo Ausetalia i Saute a o siitia foi le aofa’i o faigamalaga faavaomalo tuusa’o mai Adelaide i le toe amatalia o faigamalaga faavaomalo a le Emirates a o finau ai pea le Premier o lea setete, Peter Malinauskas mo le faamautūina o le toe faaauauina foi o faigamalaga faavaomalo a le Qantas.
Talu mai le 2013 e le’i toe iai lava nisi faigamalaga faavaomalo a le Qantas aga’i atu ma le aga’i ese mai ma Adelaide ma maua ai le avanoa o isi kamupani vaalele e faatino ai lea auaunaga.
O le toe faaauauina o faigamalaga i aso ta’itasi a le Emirates ua una’ia atili ai oloa auina atu i fafo mai Ausetalia i Saute lea ua ta’ua e toeitiiti 200 tone o oloa o loo auina atu i le United Arab Emirates i vaiaso ta’itasi.
Ua ta’ua foi e iai se pisinisi, o le Yoghurt Shop i Adelaide ua maua ana maketi faavaomalo mo le auina atu iai o ana oloa e pei o Dubai ma isi aai.
E ui la ua toe amata faigamalaga a le Emirates ae ua ta’ua le lē mautinoa o le tulaga o iai malaga a le Cathay Pacific faaopoopo atu iai ma le lē mautinoa o se tulaga ua iai talanoaga a le Premier ma le Qantas.
Puna o Faamatalaga: https://www.9news.com.au/national/emirates-international-flights-adelaide-economic-impact/086b1038-fa65-4dba-b3da-b2b4dae4c847
