Ua foufou mai i le faaiuga o lenei vaiaso se tasi o tauvaga faavaomalo e faia i lo tatou atunuu, o faigafaiva i ogasami loloto o Samoa lea e 30 aufaifaiva ma o latou vaa fagota o le a tausinio ai.
O se tauvaga o loo taulamua ai le asosi o le aufaifaiva a le atunuu e ta’ua o le Samoa International Game Fishing Association.
Ua faamoemoe e tauva ai nisi o aufaifaiva mai Amerika, Niu Sila ma Ausetalia faapea vaa fagota e fā ma o latou aufagogota mai Amerika Samoa.
Mo le silafia o se tasi lenei taaloga o le gataifale ua avea o se tauvaga faavaomalo e faia i tausaga uma, e ui sa iai le to’a ina ua pipisi le faamai Koviti-19.
A mae’a ona tatala le tauvaga lenei i le Aso Toonai 29 o Aperila lea o le a saunoa ai le afioga i le tamaitai Palemia e tatala aloaia, ona amata ai lea o le faamoemoe mo le vaiaso atoa o lumanai nei, mai le aso muamua e oo i le aso 5 o Me.
O i’a tetele o le sami e maua i le tauvaga lenei, ma o le a togi iai le mamafa i le tuu faatasiga uma o i’a o le a maua e aufagogota taitasi ona maua ai lea o le aufaifaiva e manumalo ma isi tulaga togia.
