O le tausaga e 2022 na faailoa ai le faasee atu i le atunuu o Fiti o galuega o le gaosia o se tasi o oloa tau ‘ava malosi a Samoa le beer o le Vailima, ona o fuafuaga a le kamupani o le Paradise Beverages a Fiti ua pulea le falegaosi ‘ava malosi o le Vailima i Vaitele.
E le’i talia gofie le faai’uga a lea kamupani e nisi o le atunuu, aemaise o le susuga i le alii loia o Saleimoa Charlie Vaai ma lona faletua o Beatrice Ott, ma taumafai loa e faatino ni feutana’iga e toe aumai ai lea oloa tau ‘ava malosi ua lauiloa ai Samoa i le lalolagi e toe gaosi i lo tatou atunuu ma umia lava e tagata Samoa.
O lea taumafaiga na manuia ma ave ai faamanuiaga a le ta’ita’i o le malo le tamaitai Palemia i le susuga Saleimoa ma lona aiga ina ia tau lau o le faamoemoe.
O le Aso Faraile na te’a nei na tatala ai ma umusa le nofoaga fou ua mae’a fausia e gaosi ai le beer o le Vailima i o tatou lava laueleele e pei ona sa iai.
O se nofoaga ua mae’a faatotoga i masini faaonapo nei mo le gaosia o le ‘ava malosi e pei ona fuafua e tatau ona maua i faleoloa ma pisinisi e faatau ai le ‘ava malosi a o le’i oo i aso fiafia o le Kerisimasi ma le Tausaga Fou.
E 17 miliona tala le tau atoa o le taumafaiga ua tino mai a le susuga Saleimoa Charlie Vaai ma le faletua o Beatrice Ott Vaai aemaise o i latou o loo faisea i le kamupani gaosi ‘ava malosi fou o le Vailima.
O le tasi lea o oloa a Samoa sa maua ana pine auro i tauvaga faavaomalo i Europa i tausaga ua tuana’i, a o pulea e le malo le falegaosi ‘ava malosi i Vaitele o le ulua’i pisinisi tau ‘ava malosi lea na faatūina i Samoa i le tausaga e 1978 ina ua fai paaga le malo ma se kamupani tuma’oti e gaosia ‘ava malosi i le atunuu o Siamani.
