Ua toe tatala a’oga i le atunuu e pei ona amata mai i le Iunivesite Aoao a Samoa, sosoo ai ma Kolisi ma A’oga faaauau lea na toe a’e i le Aso Lulu nei, ae o a’oga tulagalua o le aso 30 o Me ama faamuliga ai i le toe a’e o fanau i a’oga amata poo pre schools i le aso 4 o Iulai.

O le pepesi i le lautele o le atunuu o le faama’i ae o lea ua tatala feoa’iga masani a le atunuu ua lē o toe faatapulaaina e pei ona sa iai aiaiga o puipuiga i le ogatotonu o le masina o Mati ina ua mama i tua le siama o le Koviti-19, o loo faamalosia pea aiaiga o puipuiga i le fufulu mamā o aao poo lima, tausia le tumamā lautele i totonu o aiga ma falefaigaluega, faia puni fofoga ma tausi le va o tagata e 2 mita i le tutū ma le nonofo.

O puipuiga nei ua faaalia e le afioga i le tamaitai Palemia o le tiute tauave lea a tagata uma aemaise na fesiligia le taitai o le malo i le toe a’e o a’oga, pe o iai se fuafuaga a le tautua faalesoifua maloloina e faatino su’ega poo test mo fanau ina ia mautinoa e malupuipuia pea i latou a o feagai ma a’oa’oga lea ua silia i le 2 masina o taofia ina ua pepesi le siama o le koviti i le lautele o le atunuu.

Le afioga i le Palemia Afioga Fiame Naomi Mataafa ina ua maua se avanoa e faatalanoa ai, i le mae’a o le fonotaga a le Palemene i le Aso Lua o le vaiaso nei.