Ua lapataia tagata o loo tapunia se vaega o le State Highway 1 a o taumafai ai tineimu e tape se afi ua sasao ane i togavao i le itu i Matu.
Ta’ua e le Waka Kotahi o le afi lea ua mafua ai le tapunia o le auala i le va o Te Paki Stream Rd ma Cape Reinga.
Ua faailoa e le tineimu pe ā ma le 400 hectares le tele o le vaega ua aafia i le afi ae na amata mai i se vaega laititi o le togavao i le aso ananafi.
E ono vaalele helicopters o loo galulue ai fesoasoani i le aufaigaluega o loo galulue atu i le laueleele.
Fautuaina i latou e aumau i lea faaitu ma i latou foi e masani ona savavali i le Spirits Bay ma vaega lalata ane o le a tapunia ia nofoaga mo ni nai aso seia mautinoa ua saogalemu.
