O Fepuari o le tausaga fou 2025 o le a malaga ai le Komiti Faafoe o loo vaaia le faagasologa o le poloketi tasi le miliona tala a le Malo, i le fia silasila o minsita ma sui o le Komiti Faafoe i le tulaga o iai le atina’e o nuu ma afio’aga o itumalo, a o tapena ai le ulua’i lipoti faaletausaga o le poloketi.
O le ulua’i lipoti e pei ona faailoa e le tamaitai Minisita o le Matagaluega o Tinā ma Tamaitai Atina’e o Afio’aga ma Agafesoota’i o loo vaaia le poloketi, o le a muamua silasila iai le Kapeneta a o le’i tuuina atu i le Palemene e solaupule ai.
O se lipoti o le a fofola ai va’aiga ua taoto ai le atina’e o itumalo faapalota e 51 talu ona amata faagasolo lea ulua’i poloketi ua galulue faatasi ai le malo ma tagata o nuu ma afio’aga o itumalo faapalota o le atunuu.
I le feiloa’iga a tusitala ma le Minisita le afioga Mulipola Anarosa Ale Molioo sa ia faailoa ai le iai o se ulua’i paaga a le poloketi ua maua ai se isi fesoasoani tupe e 22 miliona tālā tupe Amerika o le a faasoasoa mai i totonu o le isi lima tausaga mo le atina’e o itumalo.
