Ua faailoa e le Minisita o Vaalele Sivili ae o le Minisita foi lea o pulega o malaevaalele le tofa Olo Afoa Fiti Vaai i auala o faasalalauga a le Malo, le faai’uga tusitusia a le Kapeneta na faamauina i le aso 23 o Tesema o le tausaga e 2014, lea o loo faailoa ai aiaiga o tagata taualoa e lē su’eina mo le itu tau puipuiga pe a tuua le malaevaalele faavaomalo i Faleolo.

O loo faailoa i lea faai’uga, o suli o Aigatupu, Ao o Malo, Kovana Sili, Pelesetene, Palemia, Minisita o le Kapeneta, Fofoga Fetalai, Minisita i fafo o isi malo, ma Faamasino Sili e lē tau faia ni su’esu’ega o le puipuiga.

O ta’ito’alua uma foi o i latou uma nei e pei ona faailoa atu e lē faia ni siaki o le puipuiga.

O le faai’uga lea a le Kapeneta na sainia ma aloa’ia e se tasi o tamalii o le atunuu le afioga Manualesagalala Enokati Posala sa avea ma Minisita o Galuega Tetele a le malo i le tausaga e 2014, lea sa ia vaaia ai foi ma le pulega o malaevaalele le Samoa Airport Authority.

O le lipotia ai o le taofia faamalosia i le malaevaalele i Aukilani talu ai nei o le Fofoga Fetalai ma le Minisita o Faamasinoga ona ua lē faia siaki o le puipuiga i le vaega o le malaevaalele i Faleolo ua faapitoa i pasese o tagata taualoa, o loo teena e le Fofoga Fetalai na iai se tulaga faapea na tupu ina ua taunuu i Aukilani.

Ua faailoa e le Minisita i le upega tafa’ilagi a le malo, o lana faamanatu i le kamupani vaalele o le Air New Zealand o le vaega e faatali ma faaee ai pasese taualoa o le meatotino e pule ai le malo o Samoa.

O le faiga faavae a le kamupani vaalele e na o sui o aigatupu, ae o le Malo ma le Palemia faapea Minisita o isi malo ma o latou ta’ito’alua e lē tau faia ni siaki o le puipuiga, e manatu le Minisita o se faiga faavae e mo Niu Sila e faaaogā ai, o lona uiga e talia ai foi ma ta’ita’i o le malo Samoa.

Ua tāpā nei e le Minisita o Oloa Afoa Fiti Vaai se faatoesega mai le pule o le kamupani vaalele i lona ofisa i Apia.

Se finagalo o le Minisita o galuega tetele ma pulega o malaevaalele le tofa Olo Afoa Fiti Vaai, i auala o fesoota’iga le upega tafa’ilagi a le malo.