Maua mai lipoti a le ABC News le taofia ai ma molia e leoleo le atalii o le alii Palemia o Fiti, Frank Bainimarama, i se moliaga e fesootai ma tuua’iga o sauaga faalotoiale (domestic violence), ma ua faatulaga ai nei lona tulai i totonu o se faamasinoga i Niu Sa Uelese i se taimi o le vaiaso nei.
Ta’ua i le lipoti, na taofia mai e leoleo a Kuiniselani le alii o Ratu Meli Bainimarama i le Aso Tofi o le vaiaso talu ai, e tusa ai o se pepa taofia warrant na avatu i ai e leoleo mai Niu Sa Uelese.
O le Aso Faraile talu ai na valaau ai lenei mataupu i le Beenleigh Magistrates Court i Kuiniselani, ma sa teena le totogi o se tupe e tatala ai i tua lenei alii e faatali ai le aso e valaau ai lona moliaga.
Mulimuli ane i lena lava aso na toe faafoi ai loa Bainimarama i Niu Sa Uelese, ma tulai ai luma o le Parramatta Local court i le faaiuga o le vaiaso talu ai.
O pepa a le Faamasinoga ua faaalia ai o le mataupu lenei ua taofia ai le alo o le Palemia o Fiti, e fesootai atu i se poloaiga a le faamasinoga na tuuina i lenei alii e puipuia ai nisi mai ni ana gaioiga sauā (Apprehended Violence Application).
Ta’ua e leoleo a Niu Sa Uelese, na amata suesuega i lenei mataupu ina ua māua ni lipoti e fesootai ma ni moliaga o ni sauaga faalotoifale poo domestic violence e aafia ai lenei alii.
Ta’ua i le lipoti a le ABC o le alii o Ratu Meli Bainimarama ua 35 ona tausaga, ma o loo iai i Ausetalia i se visa e lē o se visa nofomau. O Ratu Meli foi e na o le atalii e toatasi o le alii Palemia o Fiti, Hon Frank Bainimarama.
