E lē o faigofie ona talia e le to’atele o tusitala ma le aufaasalalau i Samoa fuafuaga ua faataoto e le soākomiti o tapenaga mo lea auaunaga, i le taimi o le Fono a Malo o le Taupulega.

O le feiloa’iga a tusitala ma sui o komiti o loo tapenaina le polokalame e tatala ai lea fono faavaomalo, ma le komiti o feagai ma le tapenaina o faasalalauga o le fono, na faailoa ai e le ta’ita’ifono o lea komiti nisi o aiaiga, e pei o le tasi o le vaega e faasalalauina taualumaga uma o le fono ma isi polokalame, ua na o le kamupani o le MMG mai Niu Sila ma le TV9 ma le leitio o le 2AP o auaunaga a le Malo.

E faapena foi le auaunaga a le Malo le nusipepa o le Savali ma le ofisa sooupu le Presecretariat e pue uma e ia auaunaga ata mo televise ma upega tafailagi faapea nusipepa ona ave lea e faaaogā e auaunaga uma o faasalalauga i Samoa faapea ma atunuu i fafo.

O se tasi lea o tapenaga na fesiligia ai le sui o le komiti o le Ofisa Sili o le matagaluega o fesoota’iga ma faamatalaga faatekonolosi le afioga Lefaoalii Unutoa Fonoti.

Faaalia foi e lea sui o le komiti, o faasalalauga ua saunia e le malo taavale e feoa’i ai tusitala ma le aufaasalalau, ma o se tapenaga o le a lē faatagaina ai ona faaaogā taavale a soo se auaunaga tau faaasalalauga i Samoa.

O loo sailia nei e tusitala ma le aufaasalalau i le vaega o pisinisi tuma’oti le private sector, pe maua ni pepa poo access pass e mafai ona faaaogā ai a latou taavale e aga’i ai i le nofoaga tutototnu o faasalalauga uma le media center i le leitio 2AP ma le TV9 a le malo o le a maua ai taavale ua saunia e le malo e feoa’i ai.

O se tasi o tapenaga e lē o talia gofie e tusitala ma le aufaasalalau, o le faaaliga a le komiti ua saunia media booths mo le aufaasalalau uma, ma afai e to’atele e fia aga’i i se nofoaga o faia ai se fonotaga, ona tuli lea o le to’atasi e fai ma o latou sui e ao uma mai faamatalaga ‘anoa poo facts ona faasoa lea i isi.

Ua faailoa i le komiti e lē fetaui lea tapenaga ona e lē o se faiga lea e masani ai le faatinoga o le galuega.

E na o le 20 sui o lea auaunaga ua tuuina atu a latou lesitala e maua ai le avanoa e maua le pepa faataga e ulufale ai i nofoaga e faia ai le fonotaga, peitai o loo tatala pea le avanoa lea ua faamoemoe e tapunia i le aso 21 o le masina nei o Setema.