Ua sulu nisi o pagota o loo faasala i le toese i Aukilani i Saute i le faamasinoga, ma le finau e le o lava totogi o loo totogina ai i latou a o galulue i taimi o tuli ai faasalaga.

O tama nei e toalua o Thomas Cheng ma James Hemana e faapea o loo totogi i le 60 sene i le itula, ma ua 18 tausaga e lei toe siia totogi.

O le toese i Aukilani i Saute lea o loo pulea e le Serco o loo tuli ai o laua faasalaga, ma ese mai i le maualalo o totogi, e le o fiafia foi i le taugata tele o pili telefoni o loo faaaoga e valaau ai i o latou aiga.

Ua tuuaia ai e i laua nei le minisita o falepuipui, Kelvin Davis e le o faia ona tiute e ala i le toe vaavaai i totogi o pagota, ae tuuaia le Serco i le solitulafono o tau o loo faia ai pili o telefoni.

Ripotia ai e le leitio a Niu Sila le finau malosi o le loia a le minisita ma faapea mai, o totogi o loo maua poo alauni ua na o se avanoa e tapena ai tomai ma agavaa, ae leai se faamoemoe o ni totogi.

Ae na ta’ua e le loia o loo tu mo le Serco, o loo fua tau o valaau e faaaoga ai telefoni i avanoa o loo agavaa ai le pagota e toatasi e faaaoga le telefoni mo le na o le 5 minute i le valaau e na o le faatasi ona faia i le vaiaso.

O loo tālia nei le faaiuga a le faamasinoga i lenei mataupu.