O loo umia e Samoa le pale o le Tausala o le Pasefika mai le tausaga ua mavae na manumalo ai le tamaitai o Moemoana Safaato’a Schwenke, sa ia umia foi le manumalo o le pale o le Tausala o Samoa.

O le Tausala o Samoa o le 2024 i le 2025 le tamaitai o Litara Ieremia Allan o le a ia toe finauina i le tauvaga e sa’ili ai se isi Tausala o le Pasefika pe tumau pea ona umia e Samoa lea tulaga.

Peitai ua faailoa e le komiti o le tauvaga lenei o le a faia i le atunuu o Solomona i le vaiaso muamua o le masina fou o Fepuari, ua amata faatutū laupapa faailoilo e faalauiloa ai lea tauvaga, ma o le ata o le Tausala o le Pasefika o iai nei le tamaitai o Moemoana Safaato’a Schwenke ua muamua faalauiloa ai.

E valu atunuu o le a auai o latou tausala i le tauvaga e aofia ai Samoa, o Amerika Samoa, Tonga, o le tausala mai le Atu Kuki, o Papua Niu Kini, Nauru, Kilipati ma le tausala o le atunuu o Solomona.

Ua leai ni tausala mai isi atunuu o le Pasefika sa masani ona auai i lea tauvaga e pei o Fiti, Niue, Tuvalu, o Uea ma Futuna.

O le tauvaga o le tausaga nei e fā sui o atunuu Polenisia o tausala mai Samoa, Amerika Samoa, Tonga ma le Atu Kuki, lua sui o atunuu Melenisia o Papua Niu Kini ma Solomona, ma le lua o tausala mai atunuu Maikoronisia o Nauru ma Kilipati.

O le aso muamua o Fepuari e amata ai le polokalame o le tauvaga o le Tausala o le Pasefika i Solomona ae sa’ili le manumalo i le aso 8 o Fepuari 2025.