Ua sauni alii ma faipue o Levi, Alamutu ma Salepoua’e i Saleimoa e finau lana talosaga apili e toe iloilo ai le faaiuga a le faamasinoga o fanua ma suafa na fofogaina i le masina o Setema o le tausaga nei.
O le faaiuga lea na faamaonia ai tuaoi o eleele o fanua o le afioaga o Afega ma faia ai le poloaiga e faatino loa le galuega o le fuaina o tuaoi.
O le Aso Faraile na tea nei na aumai ai le faaiuga a le Peresetene o Faamasinoga o Fanua ma Suafa le afioga Lesatele Rapi Vaai, ma teena ai le talosaga a Levi Saleimoa sa finau ai e taofi le galuega o le fuaina o tuaoi o eleele o Afega, ona ua aafia ai fanua ma meatotino a nisi o aiga o lea afioaga.
