O le Palemia o Ausetalia, Anthony Albanese o le a fesootai ma taitai o isi atunuu o le lalolagi i le po a taeao e talanoaina ai se misiona mo le tausiga o le filemu i totonu o Ukraine. Ua taua e le ABC o atunuu e pei o Farani, Siamani, Italia, Kanata o le a auai uma o latou taitai i lea talanoaga o loo tuufaatasia e le palemia o Peretania, Kier Starmer.
O loo faaigoa lea sootaga o le Coalition of the willing, ma ua faia lea fuafuaga i le maea ai o se fonotaga na faia a taitai o ia atunuu i Lonetona i lenei masina, ma e silia ma le 30 atunuu o le a aofia ai i lea talanoaga i ni avanoa e mafai ona fesoasoani ai ia Ukraine.
Ua faailoa se finagalo o le taitai le itu agai a Ausetalia, Peter Dutton i le lipoti lea e lē tatau ona auai Ausetalia i lea sootaga.
E le o mautinoa foi pe tuuina e Amerika sana fesoasoani tau le puipuiga mo Ukraine i le leoina o le filemu pe afai e iai suiga malie o le mataupu ma Lusia.
O le amataga o le vaiaso nei ua lapatai mai ai le ofisa o Lusia i Ausetalia i le auai o Ausetalia i lea sootaga, e ono iai ni faafitauli e aliae mai ai, ae ua maea ona tali iai le Minisita o le Va i Fafo a Ausetalia, Penny Wong o le a le faafefea Ausetalia e Lusia.
Puna o Faamatalaga: https://www.abc.net.au/news/2025-03-14/albanese-ukraine-peacekeeping-meeting-coalition/105051014
