Ua nofo taofia nei i le vaaiga a leoleo le tamaitai o Lyn Nauer sa sailia ona na o se tagi mai ni tagata se toavalu na tapa e lea tamaitai tupe ma tusifolau e faagaioi ai o latou pepa mo galuega faavaitaimi i Ausetalia.
O le po o le Aso Lulu na pueina ai e leoleo Lyn Nauer ma tuuina atu loa e nofo taofia a o faagasolo suesuega i tuua’iga faasaga ia te ia.
E valu moliaga o le maua e lea tamaitai o ni tupe mai se gaioiga solitulafono ua molia ai e leoleo.
O le feiloaiga a tusitala ma le sui Komesina o leoleo i le Aso Lulu na faailoa ai o loo sailia pea lea tamaitai, ae e iai le talitonuga o le mae’a faasalalau o lea faaaliga mai a leoleo i le atunuu ma talosaga ai le sui Komesina le susuga Papalii Monalisa Tia’i Keti i se fesoasoani i ni faamatalaga e saili ai, ae oo i le afiafi o le aso lava lea maua ma taofia loa i le vaaiga a leoleo.
