Na poloaia e le Alii Faamasino ia Fepuleai Ameperosa Roma le alii Avepasi ia Falaniko Auatama ina ia faia sana loia e totogi e le malo ona o le ogaoga o le moliaga o loo faasaga ia te ia.

O le oo atu ai o lenei alii i le faamasinoga e mafua mai ina ua molia e leoleo i lona umiaina o le fualaau faasāina o le cocaine.

O faamatalaga a leoleo e faapea o lea alii na maua lea e le petolo a leoleo i Sogi i le aso 20 o le masina ua mavae atu o ia umia se pepa iila o loo iai le pauta o le coacaine e tusa lona mamafa ma le 9.7 kalama.

Ua maua sa mafai ona faatino e leoleo le suesuega o le pauta ona o se masini foai mai le malo o Niu Sila aemaise ai foi suesuega a le SROS ma faamaonia mai ai.

O le faasalaga a le faamasinoga i le moliaga lea e soloatoa i le falepuipui, o le ala lea o le poloaiina o lea alii mo se loia ia faia ma e totogi e le malo.

Ua ta’ua e le Tamaitai Sui Komesina o Leoleo ia Papalii Monalisa Tia’i Keti e lē faatoa maua ai lea o lenei fualaau faasāina i le atunuu.

Faailoa manino mai e Papalii na iai nisi mataupu muamua e aofia fualaau faasāina o le cocaine ma o le mataupu lata mai na tulai mai i le tausaga e 2020 lea na maua ai cocaine o nanā i totonu o vaega o taavale e 200 kalama le mamafa ma e oo atu i le 200 afe lona faatupega pe a faatau atu.

O le a toe valaau lea mataupu i le Aso Gafua o le vaiaso fou.