Ua molia se tamaitai i moliaga o le avetaavale onā ina ua maua sa faasuāavā i le taimi na aga’i ai e piki tamaiti aoga i le faaitu i Matu i Sisifo o Sini.

O se taavale a leoleo sa petolo i Baulkham Hills i le aoauli o le Aso Gafua o le vaiaso nei na toeitiiti lavea i le taavale a le tamaitai lea a o taumafai e aga’i ese mai se driveway o se fale.

Na taofi e leoleo le taavale ma iloa ai o le tamaitai avetaavale 43 tausaga o loo faasuāavā.

Na faia e leoleo le test o lana mānava ma iloa ai e faafitu ona sili atu le malosi o le faamaoniga o loo faasuāavā.

Na pu’e ai loa e leoleo ma ave atu i le ofisa o leoleo i Castle Hill.

Ua faamālōlō lē tumau nei lona laisene ma faia iai moliaga, ua ave e leoleo lana taavale ma lipotia lea mataupu i le auaunaga e feagai ma Aiga ma Tamaiti.

O Oketopa e tula’i ai i le faamasinoga.

Puna o Faamatalaga: https://www.9news.com.au/national/woman-charged-high-range-drink-driving-school-pickup-sydney/e62fa923-9431-4757-973d-cfb1b7726b80