E maitaulia atu i foliga o le alo iloga o Samoa i le lalolagi o taaloga ma faafiafiaga i le Hollywood, le alii o The Rock poo Seiuli Dwayne Johnson, le ootia o ona lagona a o momoli mai ana upu faamalosi ma lana feau e fia faaoo ai lana lagolago ma lana tapuaiga i le taaloga a le Toa Samoa i le faaiuga o le vaiaso.

O loo faasoa solo i luga upega tafailagi le video o loo pue mai ai lenei feau faamalosiau a Rock mo le Toa Samoa, ma fai mai a ia, e molimoli mai ona moomooga ma lana faamalosiau, ma le tele o lona alofa, le tele o lona faaaloalo ma le tele o lona mitamita i le tulaga ua oo iai le taumafai a nei alo o Samoa.

Ua latou faamauina le igoa o Samoa i talafaasolopito o mea nei o taaloga, auā o se taimi muamua lenei ua oo ai se ‘au a lenei tamai atunuu i se suega siamupini poo se final i taaloga tetele faapea a le lalolagi.

Na talanoa mai Rock ma lona matuā malamalama lelei i lagona ma faalogona e mautinoa o loo iai nei foi i mafaufau o alo o Samoa ua sauni atu mo lenei taua faigata i le iuga o le vaiaso. Fai mai Rock, o lagona uma na e na te tauaveina i soo se taimi e sauni atu ai mo sana taaloga a o iai i le faagatama o le lakapi, o piiga, e oo foi i le taimi nei i isi tomai ua ia faatino nei i le lalolagi o atatifaga a le Hollywood.

O lagona ua mamafa i mafaufau o tama taaalo le tapuaiga a lo latou atunuu; ua lafo uma atu i luga o tau’au o tama taaalo le faamoemoega o o latou tagata, ma fai mai Rock e matuā lē faigofie le tauamoina o na faamoemoega, ina ia latou tali mai ma aumai se tali lelei e faamalieina ai nei faamoemoega o loo faatalitali atu i le tapuaiga a o latou tagata Samoa.

Fai mai Rock e iai lava mea e pipii mau i lona mafaufau a o agai e faatino sana taaloga, o mea foi na e faamanatu pea e ona tuaa Samoa ia te ia avea ma fu’a taulai i ana faagatama uma

Muamua o lana “Faasamoa”, o lona uiga ia mitamita i lona faasinomaga, poo ai o ia, o ia o le Samoa, o le ā lona toto, o le toto Samoa, o le ā lona DNA, o le DNA Samoa, o lona mana o le mana Samoa; o mea na e ese mai ai tatou o Samoa mai isi uma tagatanuu.

O na malosiaga uma fai mai Rock, e uunaia e se uiga lelei e peiseai ua e alu motu lava e fai se mea, e te le toe foi, pau lau taula’iga o le faatino ma ia faatini i se taunuuga lelei.

Faatāua ai i le feau taumolimoli a Rock mo le Toa Samoa, ia tuu tasi la latou taulaiga ia matuā faatino i le atoatoa la latou taaloga, aemaise ia latou tauave a latou mavaega tuua (legacy); manatua o latou tuaa, o latou tupuaga ma i latou uma o loo mamana a latou tapuaiga mo i latou aemaise le igoa o Samoa.

O le feau faamalosi a Rock e mautinoa o le agaga lena o loo iai i soo se alo o Samoa o loo ta’uta’ua i le lalolagi atoa i soo se taleni ua faaeaina ai.

Ia manuia lau taaloga Toa Samoa! Ia manuia foi le tapuaiga mau a lou atunuu i soo se tafa o le lalolagi o tapuai mai ai!