O aso nei ua tatou iai o fesootaiga faatekonolosi ua sili ona vave maua ai faamatalaga uma o se taumafaiga tau pisinisi, poo atina’e mo le manuia o nuu ma afioaga.
O le mafuaaga foi lea ua mae’a tapena ma amata faaaogā ai le fesootaiga o se upega tafailagi a le itumalo o Palauli muamua e faalauiloa ai ana atina’e o le poloketi tasi le miliona tala, lea sa faalauiloa i lenei masina o Iulai e lo latou sui faipule le tamaitai Minisita o Tupe le afioga Mulipola Anarosa Ale Molioo.
Ua faailoa e le sui faipule o lona itumalo ua amatamea i le fausia ma le faatuina o le upega tafailagi ona e tāua e maua ai e tagata uma o lona itumalo ma ē foi o Palauli muamua o alala i fafo, ata ma faamatalaga o atina’e o le poloketi o loo faaalu iai le tasi le miliona tala.
Atonu ua muamua Palauli tasi i lea taumafaiga, ae o nisi itumalo o le a mulimuli mai ai, auā o se auala tāua o fesootaiga e mafai ona faaali ai lagona ma finagalo i ni fautuaga ma tuualalo e saga tapu’e ai le lelei o lea atina’e tāua a le Malo.
