I le savalia ai nei o le 52 tausaga o le faiga paaga faavaomalo a Samoa ma le malo o Iapani ua faamauina o se tasi lea o malo o loo tele lona sao i le atina’e o le tatou tamaoaiga e ala i ana fesoasoani o loo mafai ona faatino ai nisi o galuega e lē o gafatia ona faatupe i le malosi o le tamaoaiga o Samoa.
O le tausaga e 2003 na afea ai lo tatou atunuu i le asiasiga taualoa a le Ao o lea Malo o le Emeperoa poo le tupu o lea malo.
O lona atalii ua avea nei ma Emeperoa sa faamanatu i le Aso Faraile na te’a nei lona aso soifua lea sa auai le afioga i le Ao Mamalu o le Malo, afioga Tuimalealiifano Vaaletoa Sualauvi II, o le Palemia ma ta’ita’i o le Malo faapea le auvalaaulia.
Na momoli ai i lea sauniga faamanuiaga mai le malo o Samoa i le saunoaga a le tamaitai Palemia ma faafetaia ai pea lea Malo i le fesoasoani malosi i lo tatou atina’e.
Ua 65 tausaga o le soifua o le Emeperoa o Hironomiya Naruhito sa amata lana nofoa’iga i le tausaga e 1991, ae i sootaga faavaomalo o lea atunuu ma Samoa o le aso muamua o Ianuari o le tausaga e 2013 na tatala ai le ofisa o le amepasa o lea malo i Samoa ma faamautū ai i lo tatou atunuu le sui o le malo o Iapani.
