O le lē tausisia o aiaiga o le maliega na fausia ai e le konekarate a le susuga John Junior Hunt le hall a le Ekalesia Faapotopotoga Kerisiano Samoa i Fasitootai, ua ave ai e le aulotu i le faamasinoga le finauga e ala i se su e tasi le miliona ma le sefulufitu afe tālā faasaga i lē e ana le konekarate faufale.
Na manumalo le ofo a le konekarate a John Hunt i efle tauofoga ma ia amata fausia ai le maota o le aulotu ia Tesema o le tausaga e 2020 i le tau e $950 afe.
Na totogi iai le $930 e faatino ai loa le galuega peitai na alu alu tu ua lē gaioi le fausiaina o le hall.
Ina ua tulituli e le aulotu lē e ana le konekarate e fia faaauau le galuega, peitai na siliga ma tapena ai loa le latou tagi e ave i le faamasinoga, ae toe saili tupe le aulotu ma saili le isi konekarate na latou fausia ia mae’a le galuega.
O le Aso Gafua na toe valaau ai le mataupu lenei i le Faamasinoga Maualuga, ma ua faamautū ai le faaui i tua o le loia sa tauaveina le finauga a lē e ana le konekarate, ma ua toe saili ai se isi ana loia.
Mo le itu a le ekalesia ua latou lē talia le augani a lē e ana le konekarate e na te totogi atu se tinoitupe e 300 afe tala.
Peitai o loo finau le aulotu a Fasitootai e 600 afe na latou malilie iai ma lē e ana le konekarate e totogi atu, e avea o se taui o le taimi atoa na tu ai le galuega ua lē toe faia.
Afai e lē faamalieina le itu tagi i le latou tuugatala ua malilie iai ma le konekarate, e manino le faaauau o le su a le ekalesia e iloilo ma suesue e le faamasinoga ma aumai ai se faai’uga.
