Ua maliu se teine talavou i se faalavelave tau taavale i se magaala maotua o Niu Sa Uelese ma ua molia ai le avetaavale o le taavale na aafia ai.
Fai mai le 7News o si teineititi e 15 tausaga, o se pasese i le taavale na malaga atu i luga o Werah Creek Rd i Wee Waa ma na lē mafai ona taofiofi e le avetaavale le taavale ma taavalevale ai le taavale poo le 7.45 i le po anapo.
Na togafitia e paramedics si teineititi i le vaega na tupu ai le faalavelave peitai e lei mafai ona laveaiina ma maliu ai lava.
Ua ta’ua e iai ma le tama talavou 17 tausaga sa iai foi i le taavale i lea taimi ma na avatu foi i le falemai mo togafitiga.
O se alii 44 tausaga ua molia e leoleo i le faalavelave ma ua fuafua e tulai i le faamasinoga i se aso o le masina fou.
