Ua mae’a uma taotoga mo tino maliu e 10 sa taofia i le falemaliu ona e manaomia le faamautu o mafuaaga na maliliu ai i latou.

O nisi o tino maliliu e mai ia Tesema o le tausaga na se’i mavae atu nei.

A o iai i le atunuu le alii fomai faapitoa o Dr James Kalougivaki mo le faatinoina o taotoga faapitoa sa faatinoina ai foi ma le polokalame a le Matagaluega o le Soifua Maloloina e ala i se feiloaiga a alii ma tamaitai fomai ma le fomai faapitoa mo maliu Dr James Kalougivaki, Afioga i le Faamasino ia Alalatoa Rosella Papalii ma sui o le Matagaluega e faatalanoaina ai mataupu o maliu lilo. 

O lea faatalatalanoaga ina ia faatumauina ai le lelei o fesootaiga aemaise o le siitia o auaunaga ma le tali atu i mataupu tau maliu lilo. 

Ua mae’a tuu atu le talosaga a le matagaluega mo se fomai faapitoa mo Samoa lava ia i le Kapeneta.

 E iai le fomai faapitoa a Samoa, peitai e leai se fomai faapitoa (forensic pathologist) e iai le tomai ma le agavaa e faatino ai taotoga ma suesuega i tino maliu ma faia iai se faaiuga i le mafuaaga tonu na maliliu ai.