Ua mafai nei ona faaulufale atu i Saina le susu mai Niu Sila e aunoa ma se tiute e totogia, poo le tariff.
O se tasi lenei o suiga o loo sau ma le maliega ua ta’ua o le New Zealand – China Free Trade Agreement na amata fau mai i le 2008.
O se tala fiafia tele e tusa ma molimau a le minisita o fefaatauaiga ma le vaomatua, Todd McClay e lē gata mo le aufailafumanu i Niu Sila ae faapea le tamaoaiga o le atunuu i lona aotelega.
O se suiga ua toe faasao mai ai e Niu Sila le tusa ma le $350 miliona.
I faamaumauga o tupe maua mai le susu a Niu Sila o loo faatau atu i fafo, o loo sau mai Saina le tusa ma le $8 piliona ma o le maliega o fefaatauaiga saoloto lenei ma Saina o loo tauaofai ai le tusa ma le 2/3 o oloa a Niu Sila o loo auina atu i atunuu i fafo.
