O le a faaauau pea ona taofia e Isaraelu le faataga o le aveina atu o fesoasoani mo tagata i totonu o Gaza se’i vaganā ua talia e Hamas aiaiga fou mo le faaumiumi pea o le maliega e taofia ai vesiga auā o lea ua mae’a le taimi sa faatulaga e faamuta ai i le Aso Toonai na te’a nei.

Ua faailoa e le Palemia o Isaraelu, Netanyahu o le faaumiumi atu o le maliega e taofia ai vesiga i le va o itu e lua e pei ona iai i le Vaega 1 o le maliega o le a faaoo atu i le masina Paia e pei ona iai le talitonuga Isalama lea e faamae’a i le ogatotonu o Aperila.

Fai mai a ia o le extension lea o se finagalo na faailoa ane e le faufautua a Trump i Sasae Tutotonu, Steve Witkoff.

O lea finagalo o loo lipotia le lē taliaina e le Hamas ona o loo vaavaai i latou i se tulaga e faamuta tumau ai vesiga i Gaza.

O loo finau ane foi le Hamas o le taofia e Isaraelu o le faaoo ane o fesoasoani mo Gaza o se solitulafono lea o taua (war crime), ma ua talosaga ai i mediators ina ia faamuta ai ia faiga lē talafeagai a Isaraelu.

Fai mai Isaraelu afai ae faaauau pea le mumusu lea o le Hamas o lona uiga o le a lē faatagaina foi la e Isaraelu se taofiga o vesiga e aunoa ma le faafoi ane o nisi o loo ave faapagota e le Hamas.

Puna o Faamatalaga: https://edition.cnn.com/2025/03/02/middleeast/israel-halts-gaza-humanitarian-aid-intl-hnk/index.html