Ua folafola e le faigamalo o iai nei a le Leipa o le a vaaia fua foma’i e aunoa ma se totogi a o le’i oo i le 2030 ma ua faailoa ai e le Palemia o le a faaalu e le leipa le vaegatupe e $8.5 piliona i totonu o tausaga e fā.
Fai mai Albanese i le lipoti a le 9News o ia e mana’o i tagata Ausetalia uma ina ia o latou iloa e na o a latou medicare cards e mana’omia ae lē o a latou credit cards ina ia maua ai le togafitiga o loo latou mana’omia.
Fai mai le Palemia o le medicare na amatamea ai le Leipa ma o le a o latou puipuia foi la ma faaleleia mo tagata Ausetalia uma.
Ua folasia ai ma fuafuaga a le Leipa mo le soifua mālōlōina ma ua o latou ta’ua o ia fuafuaga faataatitia o le a siitia ai le atunuu atoa ma faamautū ai, e lē o misia se tasi i ia faamanuiaga.
O lalo la o lea fuafuaga a le Leipa ua ta’ua o le a leai ai se tupe a le gasegase e faaaogāina e totogi ai le auaunaga ae faatupe uma e le medicare.
Ua folafola foi e le Leipa e 400 avanoa sikolasipi mo tausi soifua poo le nursing o le a avanoa ane faatasi ai ma le 2 afe o i latou o le a toleni e avea ma foma’i faaleaiga (GPs) i le tausaga.
Puna o Faamatalaga: https://www.9news.com.au/national/free-doctor-visits-labor-promises-universal-bulk-billing-if-elected/603d7c81-9a52-4290-8eff-dc0b81645c1f
