O se mataupu ua fofogaina i le faamasinoga e faatatau i se feeseeseaiga i le va o le Health NZ ma matua o se pepe e 4 masina sa manaomia ona faia lona taotoga o le fatu.
Ua faamatala i lipoti a le televise tasi a Niu Sila o le mataupu e foliga e agai i le mumusu o matua o le pepe e faataga le tuuina o le toto sa foai ane mai se tasi ua mae’a ona faia tuipuipui o le Koviti-19.
Fai mai a laua e pei ona lipotia o le la pepe o loo manuia ae manaomia vave se taotoga o le fatu.
Fai mai mātua o loo iai tagata e lei faia ni tuipuipui o le koviti ua ofo ane e foaiina paina toto mo le pepe pe a manaomia ae fai lava e laua le filifiliga, ma e teena e sui o le soifua maloloina lea tulaga.
O le asō la ua tulai ai sui o le Te Whatu Ora Health NZ i luma o le faamasino o Justice Layne Harvey i le faamasinoga maualuga i Aukilani ma se talosaga ina ia faatino ai le taotoga.
Na vaaia i fafo ane o le faamasinoga i le asō nisi o le aulagolago mo matua o le pepe.
Ua faailoa foi i le lipoti se faamatalaga mai le NZ Blood Service o loo iai le matafaioi a le auaunaga e faia e faamautinoa o loo sapalaia le ituaiga toto sa’o e manaomia.
