O finauga a le alii loia a Sam o loo ia faailoa ai e lē o iai se tulaga lamataia o le atunuu lautele i le tatala ai i tua o Sam.
E lē o iai foi se tulaga lamatia o lē na aafia i lenei mataupu, e lē o iai foi se tulaga faapea mai e ono lē tulai ai i le Faamasinoga lē o loo molia pe a tatala ai i tua.
E lē gata i lea e leai foi se faalavelaveina e Sam o molimau a le itu a leoleo pe a tatala i tua lea alii, ia pe toe faia foi se isi solitulafono, ma e maualuga foi le vaai i le saogalemu o lē o loo molia.
E lē gata i lea ae o le solitulafono a Sam e lē o se solitulafono matuia (minor offence) e pei o soligatulafono o loo iai i le fuaiupu 101 o le tulafono o soligatulafono e mafai ai ona fetuunai e le faamasinoga le tatala pe leai foi se tagata sa iai ana soligatulafono muamua.
Ae i lana finauga e mafai ona faamamafa aiaiga o le tatala ai i tua pe faia foi se poloaiga e tapu ai ona toe faimalaga lē o loo molia.
O le finau atu lea a le alii loia ia Fetu Lagaaiga i le iloiloga a le faamasinoga faaitumalo o le talosaga a Sam e tatala ia i tua.
O le tamaitai Faamasino ia Talasa Saaga na faatautaia lea mataupu ananafi.
Na faaalia e le alii loia e tele faamatalaga faatauto ua tuuina atu e leoleo peitai ua na o ni faamatalaga faaopoopo mai leoleo, ae e lē o i luma o le faamasinoga se faamatalaga faatauto a lē o loo tagi i lea mataupu.
Na faaalia e Lagaaia o se tulaga ogaoga lea mo ē ua molia ma e tatau ona tuuina mai mau a lē o loo tagi i le mataupu, ona o loo tele le aafiaga o ē o loo molia ma e tatau ona faamaoni lē o loo tagi i le mataupu.
O loo faapea mai leoleo e lē o iai lava se faamaumauga a leoleo o ta’ua ai o Sam sa avea ma informant poo sē sa ia tuuina atu ni faamatalaga i leoleo i ni matupu o soligatulafono, ae na faailoa e le alii loia a Sam o le mau a lē sa avea ma leoleo o le ofisa suesue ia Lemana Tomasi Tuua, o loo faaalia ai o ia sa i le ofisa suesue ma faia suesuega i le tele o mataupu, ma o Sam lē sa ia tuuina atu faamatalaga i leoleo i mataupu ua tuanai.
Na ta’ua foi e le alii loia i le Faamasinoga le tulaga na iai le faatinoga o galuega a leoleo ina ua tuuina atu ma molia Sam i le aso 26 o Ianuari o le tausaga nei, o lena lava po a o faia le faatalanoaga o Sam e leoleo i le ofisa na pueina ai e se alii leoleo le ata o Sam ma tuuina atu i le facebook, ma faia iai tala i le lē tautala i le mea moni.
Na faailoa e le alii loia o tagata ua molia se’i vagana ua faamaonia a latou solitulafono ona iai lea o se tulaga faapea, o se itu ua atagia ai le faaitu’au o le faatinoga o le galuega a leoleo.
E lē gata i lea o le aso 29 o Ianuari ma le aso 2 o Fepuari na faatoa lapataia ai loa ē ua molia i o latou aiātatau (caution).
O le taimi lea na ta’ua e le alii loia sa tatau ona valaau atu leoleo e pei ona tuuina iai lana numera ina ia auai a o faia faamatalaga ma le lapataiga o ē ua molia, peitai e lei vili atu le ofisa o leoleo, mulimuli ane o loo faaalia i le faamataga a le tamaitai Komesina lagolago ia Papalii Efo Moalele, o se sasi i leoleo le faamauina o le numera a le alii loia na mafua ai ona lē maua ina ia auai i le faagasologa o le galuega a leoleo ia Sam.
Faaalia e le alii loia a Sam o le taufaaleaga o loo molia ai Sam o se tulaga na faatino i Niu Sila e le polokalame a le Tautaia’e o lea faasalalauga sa faia e se tasi tagata.
Na faailoa foi le eseesega o le faagaioiina o le mataupu lenei ma le mataupu i le ulugalii ua molia ia Vaa ma Maylynn lea o loo molia i le silia i le 200 moliaga o le faasalaga e ono o atu i le 5 tausaga i le falepuipui, o loo iai foi solitulafono muamua a Vaa peitai e lei teena e leoleo le tatala ai o i laua i tua.
Na ia faamanino foi o le moliaga ua molia ai nei Sam i le tuuina atu o faamatalga taufaasese pe a tuu atu i le Tulafono faaleoleo i lona vaega 10(2) o lona faasalaga e lē silia ma le 3 masina i le falepuipui, ma afai lava e taofia ē ua molia o lona uiga ua foliga mai o le kuata o lea faasalaga ua mae’a tuliina.
Na faailoa foi e le loia a Sam, sa faapea le faasalalauga a le afioga i le alii Minisita i le Palemene e leai se mataupu e tuuina atu i le faamasinoga, peitai o le moliaga o le taufaaleaga o loo molia ai Sam ae o le siosiomaga o mau, o le mataupu lava i le maliu o le talavou i le taavale, pe aisea la ua saga aumai ai pea ia tulaga a o lea ua mae’a faia faasalalauga a le alii Minisita i le mataupu lenei.
Ae o loo faapea mai le itu a leoleo e lē o moliaga uma ia e pei ona tuuina mai ai le finauga a le alii loia a Sam.
Sa faailoa e le tamaitai loia ia Leinafo Taimalelagi Strickland le tele o moliaga mai lea tausaga i lea tausaga o le alii ua molia.
E lē gata i lea na iloa lelei e lea alii o loo saili o ia e leoleo e pei ona ia ta’ua i lana faamatalaga.
Aemaise ai o le tele o igoa na faaaogāina e lea alii, ma aso fanau eseese lea e silia i le sefulu taimi na fesuisuia’i e lea alii ona igoa, ma o se popolega lea i leoleo e mafua ai ona teena le tatala ai i tua.
Na faaalia e Taimalelagi e teena le faapea mai o le loia a Sam e lē o iai se tulaga lamatia o le atunuu i lea alii ona a tagai i mea sa faia e lē ua molia ona manatu lea ua aafia ai le atunuu atoa.
Na ta’ua foi molimau a nisi sa o latou mafuta ma iloa lē ua molia ma faailoa mai ai le oo atu o lea alii ma faatauanau ia auai ia tagata e lagolago lana mau a sao mai ma manuia mea uma ua mae’a tuuina atu e nisi se polomisi e ave ai o ia i atunuu mamao pe a manuia le tulaga o lana mau.
O popolega o le itu a leoleo ina ne’i faalavelaveina a latou molimau e lea alii pe a tatala ai i tua.
